Sonuncu Dalan (The Last DeadEnd) FPS və horror elementləri olan macəra oyunudur.
Süjet
Oyunda gənc alim Fərhad Novruzov rolunda oynayırıq. O, beynəlxalq televiziya kanalı üçün sənədli filmin çəkilişinə kömək etmək məqsədilə vətəninə qayıdır. Bakıda o, zərdüştiliklə bağlı qəribə hadisələrlə üzləşir və onların səbəbini araşdırmalı olur.
Gameplay və oyun dünyası
Oyun həm birinci, həm də üçüncü şəxs baxışından oynanılır. Əsas hərəkətlər və aktiv araşdırma birinci şəxs baxışında baş verir. Hadisələrin əsas hissəsi Bakıda, Azərbaycanın real İçərişəhər məkanında cərəyan edir. Bu, minillik tarixi olan, qala divarları ilə əhatələnmiş, qədim küçələri, tarixi və arxeoloji obyektləri olan şəhərin ən qədim hissəsidir.
Oyunun xüsusiyyətləri
- Yerli əfsanələrdən ilhamlanan adi düşmənlər və güclü boss-lar. Bəzi düşmənləri məğlub etmək üçün xüsusi taktika lazımdır.
- Geniş ensiklopediya və araşdırma sistemi. Oyun irəlilədikcə tarixi obyektlər, personajlar, simvollar və digər mövzular haqqında məqalələr əlavə olunur.
- Götürülə, hər tərəfdən baxıla və öyrənilə bilən interaktiv əşyalar.
- Qəhrəmanın texnoloji eynəkləri köhnə şəhərin divarlarında olan qədim dillərdə yazılmış mətnləri oxumağa və deşifrə etməyə imkan verir.
- Bəzi məkanlar real şəhər və tarixi binalar əsasında birəbir yaradılıb, çoxlu obyekt isə köhnə şəhərin milli atmosferini əks etdirir.
- Janr üçün qeyri-adi məkanlar: su basmış qala, qədim saray, qədim xarabalıqlar və digər yerlər. Bu, mistik atmosferli real şəhərdə baş verən nadir horror elementli oyunlardan biridir.
- Müxtəlif xəritələr və düşmən tipləri olan survival rejimi. Oyunçu düşmən dalğalarına dözə, müəyyən vaxt ərzində bütün düşmənləri məhv edə və ya mümkün qədər uzun müddət sağ qala bilər.
- Oyun dörd dili dəstəkləyir: ingilis, rus, azərbaycan və türk dilləri.